Search This Blog

Tuesday, April 28, 2009

2 in 1 ပရို ဂရမ်မာ

အခြားလူတွေ ကိုယ့်ကြောင့် တလွဲဖြစ်ခဲ့ရတာ ပြောပြီးတော့ ကိုယ်တိုင် ကြုံခဲ့ဖူးတဲ့ အဖြစ်အပျက် တစ်ခုကို သွားသတိရ မိပါတယ်။ အင်တာဗြူး အကြောင်းပါပဲ။

တစ်ခါက ကျွန်တော် အလုပ်ရှာနေရင်း သတင်းစာမှာ စိတ်ဝင်စားစရာ ကြော်ငြာတစ်ခုကို သတိထား လိုက်မိပါတယ်။ ပရိုဂရမ်မာ အလုပ်ခေါ်တာပါ။ ဒါပေမယ့် သူတို့ လိုအပ်တဲ့ ပညာ အရည်အချင်းက ကျွန်တော်ရထားတဲ့ အင်ဂျင်နီယာ ဒီပလိုမာ ဖြစ်နေပါတယ်။ အဲဒီ အင်ဂျင်နီယာ ဒီပလိုမာနဲ့ ပရိုဂရမ်မာ အဖြစ် အလုပ်ခေါ်တာ တခါမှ မတွေ့ဖူးတော့ ကျွန်တော်လည်း စိတ်ဝင်စားပြီး အီးမေးလ်နဲ့ အလုပ် လှမ်းလျှောက် လိုက်ပါတယ်။ ကုမ္ပဏီ နာမည်ကို ကြားဖူးတယ်လို့ ထင်ပေမယ့် သေသေချာချာ သတိမထားလိုက် မိပါဘူး။ လျှောက်လိုက်ရင် အနည်းဆုံး အင်တာဗြူးတော့ ခေါ်လောက်ပါတယ် လို့တော့ တွက်ထား မိပါတယ်။ ထင်တဲ့ အတိုင်းပါပဲ။ နောက်တစ်နေ့မှာတော့ အင်တာဗြူး လာခဲ့ပါ ဆိုပြီး ဖုန်းပြန်ဆက် ပါတယ်။ ဒါပေမယ့် သူတို့ လိပ်စာ ပြောပြတော့မှ ကျွန်တော် အင်တာဗြူး သွားရမယ့် နေရာက စင်ကာပူက နာမည်ကြီး ကုန်တိုက် တစ်ခု ဖြစ်နေတယ် ဆိုတာကို သတိထား လိုက်မိပါတယ်။

ခေါင်းတော့ အတော်စား သွားပါတယ်။ အလုပ်လုပ် ရမယ့်နေရာက ကုန်တိုက်။ လုပ်ရမယ့် အလုပ်က ပရိုဂရမ်မာ။ လိုအပ်တဲ့ ပညာ အရည်အချင်းက အင်ဂျင်နီယာ ဒီပလိုမာ။ အဲဒီ ၃ ခုကို ဆက်စပ်ပြီး တွေးတော့ ကျွန်တော် လုပ်ရမယ့် အလုပ်က ဘာအလုပ်လဲ ဆိုတာ လုံးဝ အဖြေမထွက် ပါဘူး။ ဒီလိုနဲ့ ချိန်းထားတဲ့ နေ့မှာတော့ ကျွန်တော် အဲဒီကုန်တိုက်ကို ရောက် သွားပါတယ်။ ကျွန်တော့်ကို အင်တာဗြူးတဲ့ ပုဂ္ဂိုလ်က ဘာအလုပ်လုပ်ဖူးလဲ ဘာအတွေ့အကြုံ ရှိသလဲ ဆိုတာတွေကို မေးပါတယ်။ အဲဒီမှာ Programming အကြောင်း၊ Database အကြောင်းနဲ့ ကွန်ပြူတာ ပြင်တဲ့ အကြောင်းတွေကို အဓိက ထားပြီးတော့ မေးပါတယ်။ သူ့မေးခွန်းတွေက သိပ်ပြီး ခက်ခက်ခဲခဲတော့ မဟုတ်လှ ပါဘူး။

နောက်တော့ သူက သူတို့မှာ ကုန်တိုက်ကြီး ၃ ခု ရှိတဲ့အကြောင်း၊ အဲဒီကုန်တိုက်တွေက အရောင်းကောင်တာ တွေမှာ သုံးတဲ့ ဆော့ဖ်ဝဲလ် တွေကို သူတို့ အိုင်တီဌာနက ကိုယ်တိုင် ရေးထားတဲ့ အကြောင်း၊ အဲဒီ ဆော့ဖ်ဝဲလ်ကို ပြုပြင် ထိန်းသိမ်းရမှာ ဖြစ်တဲ့ အကြောင်း၊ အရောင်းကောင်တာက ကွန်ပြူတာတွေမှာ ဟတ်ဒ်ဝဲလ်ပိုင်း တစ်ခုခု ချို့ယွင်းခဲ့ရင်လည်း သွားပြီး ပြင်ပေးရမှာ ဖြစ်တဲ့အကြောင်း ကျွန်တော် လျှောက်ထားတဲ့ အလုပ်ရဲ့ အလုပ် တာဝန်တွေကို ပြောပြပါတယ်။ အဓိက အလုပ်ကတော့ အဲဒီ ဆော့ဖ်ဝဲလ် ကိုပဲ ကောင်းသည်ထက် ကောင်းအောင် ထပ်ရေးသွားဖို့ ဖြစ်တယ်လို့ ဆိုပါတယ်။ နာရီဝက်လောက် အင်တာဗြူးပြီးတော့ သူက ကျွန်တော့်ကို ဘာမေးစရာ ရှိသလဲ လို့ မေးပါတယ်။ ကျွန်တော်လည်း စိတ်ထဲက သိချင်နေတာကို ထိန်းမထားနိုင် တော့ပါဘူး။ သူ့ကို ဖွင့်မေးလိုက် မိပါတယ်။ ခုနက ပြောသွားသမျှ အလုပ်တွေက အိုင်တီနဲ့ ဆိုင်တဲ့ အလုပ်တွေချည်းပဲ။ ဘာလို့ သတင်းစာမှာ ကြေငြာတော့ အင်ဂျင်နီယာ ဒီပလိုမာ ရှိရမယ် လို့ ကြေငြာရတာလဲ။ အဲဒီအလုပ်နဲ့ အင်ဂျင်နီယာ ဒီပလိုမာ ဘယ်လိုများ ပတ်သက်နေသလဲ ဆိုတာ သိချင်တယ်လို့ မေးမိပါတယ်။

အဲဒီတော့ သူက ငါတို့ဆီက ဝန်ထမ်းတွေ အားလုံးက စီးပွားရေးနဲ့ အိုင်တီ ဗဟုသုတပဲ ရှိကြတာ။ အင်ဂျင်နီယာ ဗဟုသုတ မရှိကြဘူး။ ဒါပေမယ့် ငါတို့ဆီမှာ ဓာတ်လှေကားတွေ လေအေးစက်တွေက ကုန်တိုက်တိုင်းမှာ ရှိတယ်။ အဲဒါတွေ ပျက်ရင် အပြင်က ကန်ထရိုက်တာတွေကို ခေါ်ပြီး ပြင်ခိုင်းရတယ်။ သူတို့ ဘာလုပ်နေသလဲ ဆိုတာ ငါတို့လည်း မသိဘူး။ အဲဒီ ကန်ထရိုက်တာတွေနဲ့ အလုပ်အတူတူ တွဲလုပ်ဖို့ ငါတို့ ဘက်က အင်ဂျင်နီယာ တစ်ယောက် ရှိဖို့ လိုတယ်လို့ ထင်တယ်။ ဒါပေမယ့် ဘာမှ မပျက်ရင်လည်း အဲဒီ အင်ဂျင်နီယာက အလုပ်မရှိပြန်ဘူး။ အဲဒီတော့ တစ်ချက်ခုတ် နှစ်ချက်ပြတ် ဖြစ်သွားအောင် ပရိုဂရမ်ရေးတတ်တဲ့ အင်ဂျင်နီယာကို တစ်ခါတည်း အလုပ်ခေါ်လိုက်တာလို့ ရှင်းပြပါတယ်။ ကျွန်တော်လည်း စိတ်ထဲမှာ ရယ်ချင်တာ မနည်း အောင့်ထားရပါတယ်။ ပရိုဂရမ်မာ အလုပ်ခေါ်ပြီး လိုအပ်ရင် ဓာတ်လှေကား ပြင်ရမယ် ဆိုတာမျိုး ဒါပထမဆုံး ကြားဖူးတာ ပါပဲ။ Mr.Bean တောင် သူတို့လောက် မရယ်ရဘူး ပြောရမလို ပါပဲ။

သူက မင်းကို သဘောကျပေမယ့် အလုပ်ခန့်ဖြစ် မခန့်ဖြစ်တော့ မသေချာဘူးလို့ ဆက်ပြောပါသေးတယ်။ ဘာလို့လဲ မေးတော့ ငါတို့ ရုံးမှာ ဝန်ထမ်းတွေ အားလုံးက တရုတ်စကား ပြောကြတာ။ မင်းက တရုတ်စကား မပြောတတ်ဘူး ဆိုတော့ မင်းကို အလုပ်ခန့်ဖို့ အခက်အခဲ ရှိတယ်လို့ ပြောပါတယ်။ ကျွန်တော်လည်း အမြင်ကတ်ကတ်နဲ့ စင်ကာပူရဲ့ ရုံးသုံး ဘာသာစကားက အင်္ဂလိပ် ဘာသာစကား မဟုတ်ဘူးလား။ မင်းတို့ ကုမ္ပဏီနဲ့ ဆိုင်တဲ့ စာရွက်စာတမ်းတွေ အားလုံးကို အင်္ဂလိပ်လို မရေးကြဘူးလား။ တရုတ်လို ရေးကြတာ ပဲလားလို့ ကတ်သတ်ပြီး မေးလိုက်ပါတယ်။ အဲဒီတော့ သူက စာရွက်စာတမ်းကတော့ အင်္ဂလိပ်လို ရေးတာပါပဲ။ ဒါပေမယ့် ကုမ္ပဏီထဲမှာ အချင်းချင်း စကားပြောတာ အစည်းအဝေး လုပ်တာတွေမှာ တရုတ်လိုပဲ ပြောကြတယ် လို့ ပြောပါတယ်။ ဒါကြောင့်မို့ မင်းသာ ငါတို့ ဝန်ထမ်း ဖြစ်လာရင် ငါတို့အတွက် အခက်အခဲ ရှိတယ် လို့ ပြန်ဖြေပါတယ်။ နောက်တော့ ဆက်ပြောစရာ မရှိတာနဲ့ နှုတ်ဆက်ပြီး ပြန်လာခဲ့ပါတယ်။

ကြုံလည်း ကြုံတတ်ပါတယ်။ ပရိုဂရမ် ရေးရမယ်။ ဓာတ်လှေကား အဲယားကွန်းလည်း ပြင်ရဦးမယ်။ တော်ပါသေးတယ်။ ညဖက်အားရင် ညစောင့်ပါ လုပ်ပေးပါဦး ဆိုပြီး မခိုင်းတာပဲ သူတို့ကို ကျေးဇူးတင်ရ ပါဦးမယ်။

14 comments:

Ko Boyz said...

အမြော်အမြင် အတော်ကြီးတဲ့ အလုပ်ရှင်ပဲ....။
မလုပ်ခဲ့ဘူးလား...။

PAUK said...

အိုး..ဒါများလွယ်လွယ်လေး..
နင်ရှောက်ပင်တက်..
ငါသံပုရာပင်ပေါ်တက်မယ် လို့ပြောလိုက်ပေါ့..

PAUK said...

ဟယ်..ကိုဘ..
ခိုးလည်တာ သိသွားပြီ..
ဟီးဟိ

နေညိုရင့် said...

ဟီဟီ.. တော်သေးတယ်။ ကတ်သီးကတ်မေးလို ့ ပေါ်ကုန်တာ။ နို ့မို ့ဆို ဝက်အူလှည့် ခါးကြားထိုးပြီး Coding ရေးနေရမှာ သေချာတယ်။ :P

သီဟသစ် said...

ကိုZTရေ..
သူတို့က Business တော့ပိုင်ပါ့နော် အအားကို မထားချင်ဘူးဆိုတဲ့ သဘောနေမှာ...
ဒါတောင် တရုတ်စကားတတ်ရမယ်က ပါသေး..

အောင်သာငယ် said...

စံပါပဲဗျာ...

megumi said...

နိုင်ငံခြားဆိုတော့လည်း ဒီလောက်တော့ရှိမှာပေါ့နော်။ :P
ဟိ ဟိ၊ ဂျပန်ပိုဆိုးသေး။ :)

နွေးနေခြည် said...

မလုပ်ဖြစ်တာတော်သေး... တော်ကြာ ဈေးပါရောင်းခိုင်းနေဦးမယ် း)

သဥ္ဇာ - Thinzar said...

အစုံလုပ်ရရင် ပျော်တော့ ပျော်စရာကြီး။ တစ်မျိုးတည်း လုပ်ရတာ နည်းနည်း ပျင်းဖို့ကောင်းတယ်။ =)

choco thazin said...

အမှန်က သူတို ့အလုပ်နေရာကို ခေါင်းစဉ်လောက်တပ်ကြတာပါ။ အခြေအနေပေးရင်ပေးသလို ခိုင်းလိုက်တာများ တောက်တိုမယ်ရကို ဖြစ်လို ့။
စိတ်ထဲရှိတာ ပွင့်ပွင့်လင်းလင်းမေးလိုက်တာ ကံကောင်းပါတယ်။

မိုးခါး said...

ဒါကြောင့် သူဌေးဖြစ်တာထင်တယ် :D

Welcome said...

မိသားစုစိတ်ဓာတ်ရှိတယ်လို့ ထင်နေခဲ့တာ
အမှန်တော့ အင်ဂျင်နီယာရဲ့ အလုပ်ကို တကယ်နားမလည်ဘူးဆိုတာ သူ့စကားအရ သိရတယ်။ လုပ်ခ ၂ ဆရရင်တော့ မဆိုးဘူးလို့ ထင်ရပါတယ်။

လေးစားလျက်

T T Sweet said...

စလုံးကအလုပ်ရှင်တစ်ချို့ ကဒီလိုပဲ ... ရသမျှ အချိုအချောင် လိုချင်ကြတယ်။ အထူးသဖြင့် ကုပဏီလည်း သိပ်မကြီးတဲ့ စလုံးတရုတ်တွေ။ ပြီးတော့ လုပ်ငန်းဘက်ဂရောင်းကို သေချာ နားမလည်ပဲနဲ့ ခိုင်းချင်တာပဲ သိကြတယ်။

Yan Yan said...

အနော်လည်းကြုံးဖူးတယ်ဗျို့ ...

ဟီးး (ရှက်ပြုံး)
မလုပ်ဖြစ်လိုက်ပါဘူး ဗျာ ဘာလို့လဲဆိုတော့ ဈေးပါရောင်းခိုင်းအုံးမယ်ဆိုလို့